Nun capítulo
anterior (IV) sinalei que xunto con o desemprego o segundo problema grave da
economía española, e con ela da galega, era a débeda privada: a débeda das familias, as empresas e as entidades
financeiras. Un problema que persiste hoxe en día e que segue paralizando a
demanda e, xa que logo, impedindo o crecemento económico.
O estoupido da
burbulla inmobiliaria no Estado español viuse acompañado do estalido da
burbulla crediticia quen, a súa vez, deixou ao descuberto unha enorme débeda privada –superaba naqueles anos o 200% do PIB
sendo a mais alta entre os países da zona euro e multiplicando por 4 o valor da
débeda pública-. Unha enorme débeda privada que afectaba, e afecta, a familias
(24%), empresas (35%) i entidades financeiras (41%).
Unha enorme
débeda privada que poñía ao descuberto algo xa sabido –e tamén denunciado
reiteradamente por voces que eran sistematicamente silenciadas tanto polos
partidos do goberno como pola maioría dos medios de comunicación e opinión- que
era que o crecemento económico español –e galego- habido na derradeira fase
expansiva tiña un dos seus fundamentos na libre disposición –barra libre para
familias, empresas, entidades financeiras- dun crédito sen límites e nas
condicións mais vantaxosas.
Un crédito ilimitado
que a banca e as caixas españolas poñían a disposición de calquera que o
demandara nunhas condicións –tipo de xuro, vencementos, avales...- enormemente
favorables pero que tamén supoñían a contracción dun elevado risco por ámbalas
partes. Un crédito ilimitado que foi intensamente estimulado –i esto hai que
dicilo con toda claridade- pola banca
internacional –liderada polas bancas alemana e francesa pero tamén
anglosaxona- que naqueles intres dispuña de moita liquidez e vía no “crecemento
económico español” unha oportunidade inmellorable para “facer negocio” como así
sucedeu.
Esta banca
internacional –da que forma parte a banca española- que participou tanto na
xuntanza de bruxas inmobiliaria española como na borracheira crediticia é, xa
que logo, responsable xunto aos respectivos gobernos –PP, PSOE- tanto do
irresponsable inchamento da dobre burbulla inmobiliaria e crediticia como dos
seus estoupidos que provocaron a crise actual. Unha banca internacional, uns
gobernos –Aznar, Zapatero- e unhas institucións financeiras públicas (como o
Banco de España e o BCE), que non repararon nos enormes riscos e debilidades en
que se estaba metendo a economía española –e galega- ao impulsar un endebedamento privado tan elevado e tan estendido.
Un endebedamento
privado –repito: o maior entre os países da Unión Europea- que ao afectar a
tódolos axentes paraliza o crecemento económico polas razóns seguintes: as
entidades financeiras pechan o crédito, as empresas o investimento privado e as
compras e as familias o consumo. Como estas son variables todas elas que turran
–nunha dirección ou noutra- da demanda agregada, a súa parálise é a parálise da
demanda o que a súa vez frea o crecemento económico. Velaí a decisiva importancia
deste endebedamento privado tan elevado e estendido. Algo que os defensores do
pensamento neoliberal non reflicten desviando a atención, por intereses de
clase –como explicarei noutros capítulos-, deica uns supostos problemas de
déficits e débedas públicos cuxa importancia non nego –especialmente a débeda-
pero que si refugo da natureza, dimensión e causas dos mesmos que reflicten as
“voces oficiais”.
Compre agora
subliñar as causas deste endebedamento privado segundo que axente económico. En
primeiro lugar as familias: as
políticas neoliberais postas en marcha polos gobernos españois tiveron entre
outros efectos unha caída da renda
dispoñible –basicamente dos salarios- das familias españolas –con as galegas no pelotón de cabeceira-.
Esta caída da renda dispoñible das familias arrastra, loxicamente, unha caída
da súa capacidade adquisitiva. Unha caída da capacidade adquisitiva que reduce
o aforro e inténtase paliar con unha maior dispoñibilidade e accesibilidade ao
crédito bancario. Un maior acceso que supón, en definitiva, un maior
endebedamento. En España este problema agudízase por unha indiscutible falta de
vivenda pública en aluguer ou venta que obriga as clases populares a acudiren
ao mercado de vivenda privada. Velaí que a maior parte do endebedamento privado
das familias españolas –e con elas as galegas- estea integrado polas
“hipotecas”: mais do 70% das familias españolas teñen que dedicar cando menos o
40% da súa renda dispoñible a pagala hipoteca.
En segundo lugar
as empresas. As empresas maiormente
vinculadas a actividade constructora –que en Galicia, p.e., eran e son moi
relevantes no tecido empresarial- estimuladas polo boom inmobiliario tíñanse
endebedado en demasía. Si na fase expansiva con a actividade constructora en
plena efervescencia este endebedamento era facilmente asumible cando estoupa a
crise e cede a actividade estas empresas deixan de ingresar e caen na quebra.
Finalmente o endebedamento
da banca –bancos e caixas- procede
fundamentalmente dos enormes riscos asumidos coa súa política de conceder
créditos sen límite deica inchar unha enorme burbulla crediticia e embarcándose –estimulada por responsables
políticos e favorecendo, unha vez mais, as grandes empresas constructoras- en
aventuras de dubidosa –sendo xenerosos- rendibilidade –AVEs e aeroportos sen
viaxeiros, parques xurásicos sen clientes, urbanizacións sen compradores,
parques industriais sen empresas .... etc-. Unhas aventuras crediticias para as
que, como dicía antes, a banca española tivo que acudir ao “financiamento
interbancario internacional” e asumindo unhas débedas que, segundo algúns
cálculos moi fiables, superaban os 400.000 millóns de euros en vésperas do
estoupido da crise. Velaí o interese da banca europea –apoiada pola troica
(FMI, BCE, CE)- en que España acuda ao rescate bancario.
O problema está
en que mentres os dous primeiros –familias e empresas (maiormente pemes)- están
pagando moi caro –desemprego, desafiuzamentos, peches...- as súas débedas, os
terceiros –a banca- grazas ao seu enorme poder de clase estalle transferindo as
súas débedas ao estado –con o apoio dos respectivos gobernos- e así transformando unha débeda que era privada
ben en déficit ben en débeda pública –volverei mais adiante sobre esto-
facendo, finalmente, que sexamos os cidadáns –basicamente os de rendas medias e
baixas- quen teñamos que pagaren esas débedas.
Deste xeito queda
manifestamente claro que é a débeda
privada, xunto con o desemprego,
o problema relevante da economía española –como da galega- xa que ámbolos dous paralizan a demanda e frean o crecemento
económico.
Manoel Barbeitos Alcantara
No hay comentarios:
Publicar un comentario