Neste ano electoral en que proliferan os diagnósticos e os balances sobre a
situación económica de España, e de Galiza, as
diversas novas aparecen moitas veces como contraditorias cando non como
antagónicas.
FROLES. O ministro español de Economía (o banqueiro De Guindos) anuncia que
a economía española xa saíu da fonda e longa recesión para iniciar o despegue: “o
PIB medrou ao ritmo do 3,5% no primeiro trimestre”. En
calculada sintonía a ministra de Traballo (a inefable Fátima Báñez) informa de
que “o desemprego rexistrado cae en España que está diante dun cambio estrutural
do mercado de traballo”. Pola súa veira o capital español presume de teren uns
resultados magníficos: IBEX 35, BANCOS, OLIGOPOLIOS... presumen de teren grandes ganancias neste ano 2015.
TOXOS. Pero nestas aparece EUROSTAT (Oficina estatística da Unión Europea)
e informa de que España estase convertendo, xunto con Estonia, no estado
europeo con maior desigualdade (maior diferenza entre as rendas altas, e as rendas
medias e baixas). O INE, a través da enquisa salarial, apunta que a media dos
novos salarios non superou os 800 euros mensuais no ano 2014 o que supón que o
salario por hora en España distánciase, mais e mais, da media na zona euro. O Servizo
Público de Emprego apunta que cando menos o 90% dos novos contratos son
precarios e de que segue medrando o número de desempregados que xa non cobran a
prestación contributiva. Pola súa veira o Banco de España (“o banco amigo dos traballadores”) ten que
recoñecer que a distribución do PIB faise cada vez mais desigual por mais
favorable as rendas de capital. Finalmente o INE informa de que España segue en
deflación.
Como explicar estas informacións estatísticas aparentemente tan contraditorias?,
quen está mentindo?.
Para atopar unha axeitada resposta a estas preguntas hai que buscala na
relativa importancia das estatísticas utilizadas para xustificar logo os
argumentos políticos. Así cando o ministro de Economía subliña que o PIB
español medra por riba da media comunitaria non está dicindo nada ou case nada
da economía española e galega. O mesmo cando a ministra de Traballo fala dun
cambio de tendencia no mercado laboral. Pois sucede que para coñecer a
auténtica realidade hai que utilizar outros indicadores.
E ben certo que os políticos, e a maioría dos medios de comunicación e
opinión, utilizan con profusión o PIB para explicar a situación da economía
esquecendo, ou ignorando, que a experiencia e as evidencias ensináronnos que
aquel (PIB) é un mal indicador para explicar o que realmente está pasando. Algo
que resulta evidente cando queremos, por exemplo, coñecer o impacto que este
PIB ten nas condicións de vida dos cidadáns galegos i españois. Que medre o PIB
non quere dicir que mellore a nosa alimentación, a nosa saúde, os nosos
empregos e salarios, a nosa calidade de vida, o noso medio ambiente....nin que
diminúan as desigualdades sociais e territoriais. I España é un caso
paradigmático desta falta de coincidencia.
Non é por casualidade que os do PNUD (Programa das Nacións Unidas para o
Desenvolvemento) perfectos coñecedores destas insuficiencias estatísticas utilicen
o IDH (Índice de Desenvolvemento Humano) por resultar, a pesares dalgunhas
carencias, un indicador moito mais fiable e completo. Nin tampouco é casualidade
que a clasificación dos estados europeos segundo o seu IDH non coincida, de
ningures, coa clasificación segundo o nivel de crecemento do PIB, nin sequera a
nivel global.
E así ocorre que mentres os políticos gobernantes españois e galegos, e os
seus altofalantes, repítenos que España é o estado da Unión Europa con maior
nivel de crecemento económico (PIB) o PNUD informa que España mantense, en
desenvolvemento económico (IDH), no furgón de cola entre os estados europeos do
noso entorno.
E as evidencias apuntan a que os do PNUD están moito mais preto da
realidade que os gobernos español e galego (PP).
Manoel Barbeitos Alcántara
No hay comentarios:
Publicar un comentario