A economía-mundo capitalista que xurdiu logo das dúas
guerras mundiais do século XX puxo en evidencia que moitas das teses clásicas
xurdidas ao carón dos séculos XVIII e XIX xa non eran válidas. As
transformacións históricas que experimentou esta economía-mundo capitalista
puxeron en evidencia a necesidade de novos plantexamentos en materia de
política económica pois os supostos da teoría clásica apareceron rapidamente como
obsoletos e inapropiados.
Por unha parte xa non se pode falar de mercados illados
nos que a demanda axústase, pola súa tendencia natural, a oferta. Tampouco se
pode falar de mercados perfectos. Agora nin os mercados son perfectos, precisan
sempre da intervención do estado, nin teñen comportamentos individuais senón
que uns inflúen noutros moitas veces de xeito decisivo como mostrei nalgúns dos
textos anteriores.
Un dos casos paradigmáticos tanto da necesidade dunha
intervención pública como da existencia dunha relación entre os mercados é o diñeiro, o mercado monetario. Segundo a
teoría clásica neste mercado ao igual que sucede no resto dos mercados, o prezo
–a taxa de xuro- remata sempre
volvendo, tarde ou cedo, a súa posición de equilibrio (oferta=demanda), pois
resulta seren o seu “nivel natural”, sen que sexa necesaria unha intervención
externa –das autoridades monetarias, por exemplo-. A demanda monetaria sempre
remata por axustarse a oferta monetaria ao prezo (taxa de xuro) de equilibrio e
sen que interveñan, por caso, outros mercados nin sexa necesaria unha actuación
pública pois trátase de mercados perfectos e autónomos que procuran o
equilibrio por si mesmos, naturalmente.
Pero, unha vez mais, os postulados clásicos chocan con as
evidencias. A mesma existencia de bancos centrais xa indica que os gobernos si inflúen
decisivamente sobre a oferta monetaria, sobre a cantidade nominal de diñeiro.
Unha oferta, unhas cantidades de diñeiro que determinan os tipos de xuro. Non
sendo, xa que logo, nin os rendementos de capital nin os prazos –o mercado en
definitiva- como subliña a teoría clásica, quen determina aquel senón a
autoridade monetaria.
Unha autoridade monetaria que ao influír na oferta
monetaria –cantidade de diñeiro- inflúe, antes de nada, no tipo de xuro. Ao
influír no tipo de xuro faino indirectamente na demanda de diñeiro e na
inversión. Ao influír na inversión faino, finalmente, sobre a demanda agregada
e por tanto na produción e no emprego. As autoridades monetarias poden, xa que
logo, influír no emprego a través da política monetaria en contra do que
defende a teoría clásica. Esta argumenta que o goberno so pode influír na
creación de emprego a través da política salarial, incidindo sobre el nivel
salarial para que este coincida –axústese- ao seu nivel de equilibrio: un nivel
que os clásicos aseguran que coincide co pleno emprego e que so deixa de
coincidir se inflúen factores externos, se os traballadores resístense a
percibiren uns salarios que sexan compatibles coa produtividade. Unha resistencia
que tería o seu soporte na negociación colectiva. Velaí, como xa expliquei en textos
anteriores, o pensamento liberal que, inexplicablemente, volve a estaren
vixente hoxe en día en moitas instancias da Unión Europea como por caso a
troica e a maioría dos gobernos europeos.
Un pensamento neoliberal que turra por eliminar a
negociación colectiva, polas razóns apuntadas, e que se nega –como sucede co
BCE e o mesmo Banco de España- a que a política monetaria teña entre os seus
obxectivos estratéxicos a creación de emprego –algo que si ten a Reserva
Federal- para o que sería preciso que os bancos centrais estean coordinados e
en sintonía coas autoridades públicas, o que non sucede actualmente na UEM –o
BCE e independente dos gobernos europeos e camiña a ditado da grande banca
europea-.
Velaí que cando dende o Banco de España ou do propio BCE
atacan aos salarios como culpables do desemprego estas autoridades monetarias estean
buscando desviar atención das súas propias responsabilidades nas recesións
económicas e no desemprego que son moito maiores pola súa decisiva influencia
na política monetaria.
Manoel Barbeitos Alcántara
1 comentario:
Que podería pasar se o traballo humano asalariado deixara de ser considerado como unha mercancía mais?
Publicar un comentario