Un dos paradoxos científicos destes principios do século
XXI é o de que mentres a maioría das ciencias continúan avanzando, algunhas de
forma impresionante como as matemáticas, a física, a química, a bioloxía, a
astronomía, a antropoloxía, a xeoloxía, a xeografía, a historia, a psicoloxía …
etc., outras, como por caso a economía, retroceden. Así un ten que observar,
atónito, como en pleno século XXI e maiormente por parte de distintos poderes
políticos, económicos e mediatices intentan impoñernos en Europa, con notable
éxito político, ideas e teses económicas propias do século XIX. Todo a pesares
de terse mostrado abondo como ineficaces e/ou inservibles.
O fracaso destas teses, chamadas neoliberais, que
defenden a austeridade fiscal, a rebaixa salarial e a privatización de activos
públicos entre outras medidas é abondo manifesta co longa crise que ateiga aos
estados da Unión Europea –lembremos que o grande estoupido produciuse no ano
2008-. Non resulta comprensible, xa que logo, senón é dende unha perspectiva de
clase, que se segan defendendo e/ou promovendo polos partidos políticos, os
medios de comunicación e, en xeral, a elite dominante.
Pero así sucede como estamos vendo agora en España por
parte dunha forza política –Ciudadanos-
que ven de ter unha aparición fulgurante no panorama político español. Unha
formación que se autoproclama moderna pero que nembargante, e especialmente en
materia de política económica, defende postulados propios do século XIX.
Insólito, cando a historia económica das derradeiras décadas pon en evidencia,
un día si e outro tamén, que eses principios económicos están obsoletos. Que de
ningures serven para un crecemento económico sostido e unha creación de emprego
estable e importante. Insólito pero real se analizamos, por exemplo, as
propostas de Ciudadanos en materia de política laboral a través tanto do seu
programa electoral como do documento que ven de asinar co PSOE e que ambos presentan
como “Acordo para un goberno reformista e
de progreso”.
No seu programa electoral Ciudadanos imputa a crise
española exclusivamente a causas internas entre as que destaca, como non, o
mercado laboral. Un mercado laboral que, segundo Ciudadanos, debe ser
flexibilizado, introducindo a posibilidade de contratos mais flexibles e mais
baratos así como maiores facilidades para o despido que non é outra cousa que
unha aposta pola xeneralización dos chamados “minijobs”. No Pacto
PSOE-Ciudadanos, mais do mesmo. En primeiro lugar cabe destacar que de ningures
se apunta a derrubar a actual reforma laboral e/ou a recuperar dereitos
laborais que foron eliminados polo goberno anterior. Introdúcense modalidades
de contrato –como o famoso “contrato único”- que supoñen maiores facilidades
para o despido –menores indemnizacións e custos para as empresas- e unha mingua
dos dereitos laborais do traballador. Tamén se fomenta a contratación a baixo
custo que non é, como sinalei, mais que unha nova modalidade de “minijobs” que
se queren ampliar e estender. En definitiva rebaixas nos salarios reais e maior
precarización nos empregos: isto chámase flexibilidade.
En termos macroeconómicos ámbalas dous propostas apóianse
na teoría neoliberal. Unha teoría sobre o mercado de traballo –que se basea
fundamentalmente na chamada lei de Say dos mercados perfectos e sobre a que xa
teño escrito en textos anteriores (M. BARBEITOS: “Vellos e caducos dogmas II”. Foro CLARIDADE, setembro 2015)- que
pon a aceno na oferta laboral. Segundo esta teoría –un auténtico dogma- “hai no mercado de traballo unha tendencia
natural, automática deica a plena ocupación, deica o axuste da oferta e a
demanda”. Pero que pasa cando a
pesares desa “tendencia natural” a demanda non se axusta a oferta de traballo
e, xa que logo, estase nunha situación de desequilibrio, de desemprego?. “Sempre
que se produce esa situación é conxuntural pero de prolongarse” –como
por caso está a suceder en Galiza e en España- é sempre, segundo estes profetas, “debido a conduta dos traballadores que non queren traballar por que
se negan a rebaixarse o salario (nominal e real) e a aceptar o salario de equilibrio. E si un
traballador non quere traballar non hai xeito de obrigar a traballar a quen non
quere facelo. Bastaría con que eses traballadores abandonaran a súa teima a
unha redución dos seus salarios monetarios, admitiran unha baixa nos salarios
reais, para que o mercado de traballo acadara o equilibrio o con el o pleno
emprego”. Velaí a base dos programas anteriormente citados: rebaixa nos
salarios reais para así conseguir o equilibrio entre a oferta e a demanda de
traballo quen leva o pleno emprego. Un mundo feliz: so fai falla que os
salarios sexan “flexibles”.
Non deixa de sorprender, como dicía ao principio que en
pleno século XXI intenten convencernos de que os gravísimos problemas de
emprego e salarios en España resolveríase con solucións propias do século XIX
–por certo algo que nunca sucedeu. España ten un dos mercados de traballo
europeos menos regulado, mais flexible e mais precario pero nembargante mantén
as taxas mais elevadas de desemprego en Europa-.
En fin…. cousas da
vida.
Manoel Barbeitos Alcántara
2 comentarios:
El error es considerar que la Economía es una ciencia. Al igual que la historia solo se verifica una vez que los hechos ya han sucedido y se escribe e interpreta al servicio de los poderosos. Lo que califica a cualquier ciencia es que la repetibilidad de los resultados no permite interpretaciones.
Isidoro
GUEREÑU DIJO: NO TODAS LAS CIENCIAS FORMULAN LEYES QUE SE CUPLEN. CADA UNA TIENE SU MÉTODO Y ESO ES LO QUE DISTUINGUE A UNA CIENCIA DE OTRA. LAS CIENCIAS APLICADAS TIENEN UN MÉTODO, LAS SOCIALES OTRO, LAS NATURALES OTRO. LAS MATEMÁTICAS NO SON DE NINGUNA DE LAS ANTERIORES Y SON CIENCIA. SI EL MÉTODO ES CIENTÍFICO, HABLAMOS DE CIENCIA. CREO YO...
Publicar un comentario