Entre tanto
ruído político-mediático, de baixísimo perfil e calado, unha información
estatística de grande relevancia social e política pasa coase desapercibida. “O
IGE fai públicos os rexistros de mortalidade mais recentes (2014) e neles
rexístranse 390 falecementos por autolesións e suicidios. Son case 40 mais que
un ano antes e practicamente iguala o maior rexistro da serie histórica que
comeza no ano 1980. Unhas mortes por suicidio que superan as provocadas polos
accidentes de tráfico” (PRAZA PÚBLICA dixital 31.03.2016).
Como poden
suceder estes feitos?, Suceden por que a situación tanto en Galiza como en
España e moi mala para as clases de rendas medias e baixas –as clases
populares-. Moito peor do que as elites económicas, políticas e mediatices
están dispostas a recoñecer. Unha situación que é moi mala por causas
políticas: polo chamado “austericidio” que con tanta saña e teima aplican os
gobernos galego e español (PP) baixo o paraugas da troica (FMI, CE, BCE).
Xa tiñamos
noticias dos efectos dos axustes fiscais, as rebaixas salariais e a venda do
público sobre as clases populares gregas –o número de suicidios medrou nun 43%
dende o inicio da crise- pero como Grecia queda algo lonxe o impacto da noticia
é moito menor. Tamén sabíamos que non so o pais grego sufría este drama pois
segundo as fontes mais fiables o impacto estendese por todo occidente. Un
impacto avaliado en mais de 10.000 os suicidios habidos a ámbolos dous lados do
Atlántico Norte dende que estoupou a grande crise (2008),. Neste contexto non
deberá, xa que logo, estrañar que en Galicia, en España, tamén sucedan estas
cousas. E polas mesmas causas. Poida que agora os galegos, moi especialmente as
súas elites políticas e mediatices, tomemos mais en serio o impacto de
determinadas políticas sobre as clases populares
Galiza ven
experimentando nos derradeiros anos un incremento notable dos suicidios. Un
incremento tal que no ano 2014, con 390 suicidios, rexistrou a maior cifra nos
derradeiros vinte anos. Un número de suicidios que supoñen o 10% do total
habido en España e que colocan a Galiza, xunta a Asturias, no pelotón de cabeza
das comunidades autónomas españolas segundo a taxa de suicidios por 100.000
habitantes. Así se analizamos os datos dos derradeiros anos (IGE) atopámonos
con que en Galiza deuse un notable crecemento dos suicidios a partir do ano
2008 –que coincide co ano en que estoupou a crise financeira- cando supera
claramente a cifra dos 300 suicidios anuais.
A hora de
buscar as posibles causas de este terrible feito expertos na materia
relaciónanas coa crise que vivimos e as políticas que se aplican. Segundo o
voceiro do Movemento Galego da Saúde Mental (MGSM) "o incremento de suicidios é a punta do
iceberg dun nivel de sufrimento moi elevado da sociedade e, aínda que as orixes son diversas,
si cabe ligalos a un cambio significativo nas condicións de vida da cidadanía
que a crise económica contribuíu a agravar” (MIGUEL A. GARCIA, voceiro do
MGSM).
A propia ADSPG
(Asociación para a Defensa da Sanidade Pública de Galiza) xa avisará do risco
que suporía para a saúde o desmantelamento e privatización da atención
sanitaria pública e de servizos relevantes como por caso o de saúde mental. “O
goberno da actual Xunta de Galicia (PP) paralizou o Plan Estratéxico de Saúde
Mental 2006-2011 –aprobado polo Consello da Xunta de Galiza o 5 de outubro do
2006- que viñera a cubrir un baleiro inxustificable, xa que Galiza era a única
comunidade autónoma española que non tiña, nin tivera nunca, un plan de saúde
mental desta natureza. Unha parálise que non foi endexamais xustificada, e que
está levando a este servizo sanitario público a unha enorme deteriorización da
súa actividade” (MARIA L. LORES A. “O
desmantelamento dos recursos sanitarios”. TEMPOS NOVOS, febreiro 2015).
Esta relación
entre políticas de axuste fiscal e rebaixa salarial -que supoñen recortes na
atención sanitaria, elevado desemprego, caída dos salarios, perda da vivenda,
exclusión social- e incremento dos suicidios é, hoxe por hoxe, unha evidencia
en toda Europa. Varios estudios feitos pola universidade de Oxford en
colaboración coa Escola de Hixiene e Medicina Tropical de Londres demostran
que, en todo o mundo, un número moi elevado dos suicidios –que os autores
calculan en 10.000- están relacionados coa crise económica e coas políticas de
austeridade. Non por casualidade na Unión Europea as maiores taxas –mais de
6.000 suicidios anuais- están nos estados da eurozona –Grecia, Italia, Irlanda,
España, Portugal-, nos que se aplican con mais dureza o austericidio e as
rebaixas salariais que nos estados do Norte onde as políticas de apoio as
traballadores desempregados e as familias afectadas pola crise son mais
potentes.
Tódolos
estudios serios sobre a materia son, xa que logo, concluíntes: coa austeridade
increméntase a taxa de suicidios. E Galiza non é unha excepción nin moito
menos.
Manoel Barbeitos Alcántara
No hay comentarios:
Publicar un comentario