Manoel Barbeitos
Cando un lee ou
escoita as declaracións e manifestacións dos executivos, dirixentes políticos,
banqueiros, grandes empresarios e medios de comunicación e opinión europeos
sobre Grecia, os seus actuais gobernantes (Syriza) e incluso sobre o propio
pobo grego non pode por menos de solidarizarse con Syriza e con Grecia diante
de ataques tan inxustos, desproporcionados e interesados.
Empecemos polas
acusacións sobre o falseamento das contas
polos gobernos gregos. Neste caso cabe subliñar que foron os gobernos
anteriores a Syriza quen falsearon as contas e que ademais non foron os únicos
que o fixeron para evitar “ser intervidos”. Vexamos por caso o comportamento do
Deutsche Bank, principal banco alemán e quizás o banco mais grande do mundo si
temos en conta os seus balances, que ten ademais unha influencia enorme no BCE
(e por deriva na Troica e no propio goberno da Sra. Merkel). Repasemos a súa
historia mais recente e inmediata que é a historia dunha parte moi relevante do
capitalismo xermano e tamén da clase dirixente de Alemaña.
O comportamento deste
banco alemán durante a crise é paradigmático da conduta que o goberno alemán
critica dos gregos: a mentira, a ocultación do estado real dos seus balances. A
súa participación no mercado de derivados dos Estados Unidos provocáralle (ano
2009) unhas perdas calculadas en 12.000 millóns de dólares. Unha perda que
ocultou mentindo sobre os resultados e anunciando, pola contra, uns beneficios
de 18.000 millóns de euros: esta operación –baseada en disimular perdas
mediante amaños contables a espreita de que volvan os beneficios- tiña como
obxectivo facer subilo prezo das súas accións e evitar así o “rescate”:
operación que tivo un relativo éxito pois o valor das accións duplicáronse. Con
estes enganos, e grazas a complicidade –“portas xiratorias”- que este Banco
tiña, e ten, tanto co goberno alemán (compre subliñar que nesas datas xa era
cancellera a Sra. Merkel), como ca troica e co propio goberno dos Estados
Unidos, o Deutsche Bank conseguiu non seren intervido. Non esta de mais lembrar
asemade as excelentes relacións que este banco mantivo no seu día co réxime
nazi: unha auténtica conivencia (http: //wikipedia.org/wikiDeutsche_Bank).
Sobre a corrupción política estes políticos
alemáns tampouco están para dar leccións. En concreto e facendo referencia o
mais furibundo “inimigo” do actual goberno grego, o Ministro de Finanzas
Alemán, herr Wolfgang Schüable convén saber que este político que fora elixido
presidente federal da CDU en novembro de 1.998 –con A. Merkel de Secretaria-
tivo que dimitir do seu cargo no ano 2000 por mor dun escándalo de
financiamento ilegal do seu partido o CDU, o chamado caso “Spendenaffäre”
considerado o escándalo de corrupción mais grave da historia de Alemaña. En
comisión parlamentaria Schüable tivo que admitir que o seu partido (CDU)
aceptara unha doazón feita polo traficante de armas Karlheinz Schreiber que en
1994 fora condenado por evasión de impostos. Os responsables da CDU remataron
admitindo que había cantidades de diñeiro que non figuraban na contabilidade da
CDU, feito tamén admitido posteriormente polo propio Helmunt Kohl (http://wikipedia.org/wikiWolfgang_Schauble).
Finalmente en canto ao
pagamento das débedas non esta de
mais volver a recordar que pasou coa enorme débeda Alemaña logo da II guerra
mundial. Mediante o chamado Acordo de Londres de 1953 os (25) países aliados
–entre os que estaba Grecia que fora masacrada polo réxime nazi- concederon a Alemaña
Federal unha quita da súa débeda (maiormente privada) do 62%: o redor de 24.250
millóns de marcos daquela época. Alemaña rematou de pagala débeda restante
cincuenta anos despois -exactamente o 3 de outubro do 2010- (http://wikipedia.org/AcuerdodeLondresde1953sobreladeudaalemana).
Puidera pareceren que desculpo
os comportamento falsarios, corruptos,….. de ningures das maneiras. Simplemente
digo que algúns, por caso os políticos, empresarios e financeiros alemáns,
antes de esixirlle aos demais europeos que cumpran os “compromisos”, antes de
seren tan duros e inflexibles con determinados países deben empezar por seren
eles mesmos consecuentes co que reclaman aos demais. Do contrario os seus argumentos
perden credibilidade quedando en evidencia que existen “outros intereses” menos
obxectivos e lícitos.
Simplemente, e para
finalizar, que un xa está farto das leccións de ética, seriedade, rigor e
responsabilidade que por parte da “elite” Alemaña se nos queren dar ao resto
dos europeos e moi especialmente aos “periféricos”. Leccións que agochan un
real interese de clase: da clase capitalista Alemaña.
No hay comentarios:
Publicar un comentario