Fai xa algunhas semanas varios medios de comunicación recollían unha
noticia financeira que a pesares da súa extremada relevancia e significado non
recibiu a atención mediatice, coas oportunas explicacións, que debera: "as
autoridades do Reino Unido e dos Estados Unidos impuxeron unha abondosa multa
de 5.780 millóns de euros a seis grandes bancos -CITIGROUP, RBS, J.P.MORGAN,
BARCLAYS, ROYAL BANK OF SCOTLAND e UBS- polas súas prácticas fraudulentas no
mercado de divisas".
Antes de entrar na avaliación deste feito convén saber que todos, todos
estes bancos estiveron intensamente involucrados na crise financeira do 2008
polas súas "malas prácticas": non parecera, xa que logo, que
aprenderan ren da maior crise habida dende a II Guerra Mundial. Convén saber
tamén que a maioría destes bancos percibiron cuantiosas fondos públicos para
así poder facer fronte aos seus problemas de solvencia e liquidez derivados dos
riscos asumidos e os elevados niveis de apalancamento. Finalmente compre saber
ademais que no mercado de divisas, onde os principais axentes son os bancos, a
maioría (95%) das transaccións son especulativas quedando unha moi pequena
parte (5%) para o investimento e o comercio: unhas transaccións que superan o volume
diario dos 5,5 billóns de dólares. Neste mercado os bancos especulan con
determinadas moedas, a alza ou a baixa, co gallo de obter ganancias cos
diferenciais dos tipos de cambio sen que lles importe as perdas, e os prexuízos,
que provoca ao conxunto da sociedade esta inestabilidade monetaria. Neste caso
tratase da manipulación conxunta -por parte dos bancos citados- dos tipos de
cambio no que tamén veuse afectado o euro. Por si isto non fora suficientemente
escandaloso compra subliñar que aparecen implicados importantes responsables
das autoridades británicas de control.
Sen deixar de criticar, como é xusto, este novo comportamento indecente e
criminal dunha parte da grande banca europea e estadounidense considero mais
importante explicar como é posible que sucedan estas repetidas "prácticas
bancarias" que agora, na mundialización neoliberal, tanto se repiten sen
que se lle poña freo por parte das distintas autoridades europeas e
estadounidenses.
Grazas a que o sector bancario estivera fortemente regulado durante varias
décadas, e logo da terrible experiencia do crash de 1.929, non se produciron
importantes crises bancarias e bursatis. Unha regulación moi estrita que
limitaba o campo de acción dos bancos co diñeiro dos seus depositantes.
Mediante a chamada Lei Glass Steagall Act
os bancos de depósito -tamén chamados bancos comerciais- tiñan limitado o
seu campo de acción á concesión de prestamos a particulares e a empresas pero
tiñan prohibida a emisión de títulos, accións ou calquera outro instrumento
financeiro. Actividade que quedaba reservada aos bancos de negocios -ou bancos
de investimentos- que si podían captar os seus recursos nos mercados
financeiros para así emitir títulos, accións e demais produtos financeiros. Non
menos importante foi que durante eses anos xunto a banca privada houbera, en
moitos países, unha importante banca pública.
Esta situación cambiaría a finais dos anos 70 e coa liberalización e o desregulamento
habidos as crises bancarias e bursatis multiplicaríanse. No ano 1.971 o goberno
Nixon "liberalizou" o
mercado de cambio ao suprimir a convertibilidade do dólar en ouro e crear uns
tipos de cambios flotantes, liberalización que se ampliou ao mercado de obrigacións
e de accións. Esporeados por esta decisión a maioría dos países
industrializados procederon a abolir tódolos controles administrativos sobre os
tipos de xuro, de crédito e de movementos de capitais. Esta
"liberalización" bancaria incrementou o volume -unha enorme masa- de
capitais que empezou a circular libremente por todo o mundo sen control estatal
algún.
Unhas décadas mais tarde -finais dos anos 80, primeiros dos 90: con Clinton
na Casablanca- suprimiuse a separación creada pola Lei Glass Steagall entre bancos comerciais e bancos de investimento
dando paso ao que se chamaría banco universal: una banco que tanto actúa como
banco de depósito, que como banco de financiamentos e de investimentos,
como banco de negocios e incluso como
compañía de seguros. Esta "desregulación"
supuxo grandes cambios no sistema bancario: por unha parte favoreceu a aparición
de grandes bancos universais -too big to
fall- que nembargante "teñen o demo dentro": os riscos derivados
das operacións financeiras afectan a todo o banco podendo, xa que logo,
repercutir sobre a sección de depósitos e poñer en risco os aforros das
familias, das pequenas e medianas empresas, o comercio polo miúdo, das
administracións públicas que teñen depositados seus fondos nese banco. Un
riscos, por outra parte, que estes grandes bancos asumen con alegría xa que por
seren bancos de depósitos saben que en caso de teren dificultades -como sucedeu
coa crise do 2008- os estados acudiran de inmediato ao seu rescate pois estes
están obrigados pola garantía do Estado da que se benefician os depósitos dos
aforradores -ata os 100.000 euros-. Os bancos, xa que logo, "xogan sobre
seguro", poden especular con alegría sen medo as consecuencias. Vimos de
coñecer, coa crise do 2008, unha confirmación desta realidade.
Uns grandes bancos que, podendo actuar con total liberdade e falta de
control administrativo, nun mercado
financeiro totalmente liberalizado e desregulado optaron maioritariamente
polas operacións financeiras i especulativas (95%) reducindo ao mínimo (5%) as
vellas operacións como banca de depósito: canto maior risco e maior
complicación maiores ganancias. Operacións especulativas que abranguen tanto ao
mercado de cambio como aos chamados produtos derivados, como as materias primas
e os alimentos, as débedas soberanas... Todo está legalmente permitido neste
"casino mundial" como corresponde a ideoloxía neoliberal que domina o
mundo occidental.
Claro que, como operacións especulativas que son, poden teren gravísimas
consecuencias para millóns de persoas. A especulación con os alimentos e as
materias primas provocou nos anos 2007 e 2008 unha escalada dos prezos nos
alimentos e no petróleo que, no primeiro caso, produzo que se incrementara en
150 millóns o número de persoas que no mundo pasan fame. A especulación no
mercado cambiario en 2013 fixo que as moedas de moitos países emerxentes
(India, Brasil, Arxentina, Turquía..) perderan preto do 20% do seu valor co
correspondente impacto na súa balanza de pagos. A especulación coas débedas
soberanas está a provocar enormes problemas financeiros aos países europeos
periféricos que vense así sometidos ao chantaxe da troica (FMI, BCE, CE). A
crise financeira do 2008 está relacionada coa especulación dos bancos coas
hipotecas privadas –primeiro se titularizaron e logo as converteron en produtos
especulativos-.
Por si isto non fora suficiente os grandes bancos, favorecidos pola
desregulación bancaria, tamén se dedican a outras actividades non menos
ilícitas cando non autenticamente criminais: ao branqueo de diñeiro procedente
da droga –o caso do banco británico HSBC, que xa participara no comercio do
opio, é paradigmático-, a evasión e o fraude fiscal –no que a banca suíza UBS é
unha abandeirada-, a manipulación dos prezos da enerxía –na que se viu
involucrado o Deustche Bank-….
Unhas operacións especulativas que os bancos realizan recorrendo ao apalancamento
-mais e maior endebedamento por parte dos bancos-, as operacións fora de balance –financiamento, e dicir débedas que non
aparecen nos balances contables-, a “banca
na sombra” –creación polos bancos de sociedades financeiras que actúan no
seu nome- e aos “paraísos fiscais”.
Todas elas operacións de moi alto risco i elevado fraude que precisan tanto do consentimento
das autoridades políticas –nacionais e internacionais- como dunha constante e
crecente rentabilidade dos operacións en curso. Algo explosivo pois tan axiña
como esa rentabilidade se cae os bancos entran en gravísimos problemas de
solvencia e liquidez, en creba. Claro que como se sabe cando iso pasa as
autoridades políticas –gobernos e bancos centrais- acoden raudas no seu
auxilio. Mentres os responsables e altos directivos deses bancos e, xa que
logo, máximos responsables quedan, na maioría dos casos, impunes sendo
protexidos polas autoridades políticas e xudiciais. Unha impunidade que anima a
aqueles a continuar con as súas prácticas especulativas, a acometer mais e mais
abusos e correr mais e mais riscos.
Mentres as autoridades políticas –como por caso a troica: FMI, BCE e CE-
aparecen moito mais preocupadas e mais intransixentes co comportamento de
gobernos–coma por caso o actual goberno grego- e partidos responsables –Syriza,
Podemos…- que non queren respetar a súa lóxica neoliberal e atrévense a
cuestionar o comportamento destes bancos.
“O casino segue aberto: fagan xogo señores banqueiros!”
Manoel Barbeitos Alcántara
No hay comentarios:
Publicar un comentario