En poucas semanas,
exactamente entre o 30 de novembro e o 11 decembro, celebrarase en París a XXI
Conferencia das Nacións Unidas sobre o Cambio Climático.
E moi posible
que os terroristas que levaron a cabo o criminal e monstruoso ataque na noite
do 13 de novembro, que provocou 139 persoas mortas e 415 feridas, tiveran
presente este feito e buscaran así que a súa acción producira un maior impacto
tanto mediático como político. Poida que a reacción do goberno francés que
preside F. Hollande tamén estea en parte condicionada por ese evento. Sempre
quedarán as dubidas, pero o que non parece cuestionable é que nesas datas os
estados presentes no acto, maiormente os mais industrializados, deberan estar
preparados para chegar a un acordo que, cada día que pasa, aparece como mais
urxente. Un acordo que permita unha redución efectiva dos gases de efecto invernadoiro.
Xa non é discutible que hai un quentamento global da atmosfera e que este
débese fundamentalmente as actividades humanas. Xa ninguén pode negar esa
evidencia tanxible e obxectiva.
Unha realidade
que ofrece perspectivas moi sombrías de non tomar medidas de xeito inmediato. Segundo
o IPPC –Grupo Intergobernamental de Expertos sobre o Cambio Climático, creado
polas Nacións Unidas-, “a hipótese mais pesimista –sen un esforzo real na
redución dos gases- predi, de aquí a 2100, temperaturas o redor de 4ºC mais elevadas a escala planetaria
e de o redor de 6ºC mais na superficie terrestre, é dicir, o caos. Nin sequera
os escenarios intermedios poden garantir unha estabilización a medio prazo. So
a hipótese optimista permitiría conter o aumento da temperatura global por
debaixo de 2ºC, un límite que non se debe superar e, preferiblemente, que nunca
se debe acadar. Mais aló, non e posible descartar a aceleración deste fenómeno
con o rápido desxeo de Grenlandia, a modificación da circulación oceánica
profunda e o desxeo do permafrost” –solo conxelado en profundidade- “nas terras
boreais que conlevarían a liberación masiva de CO2” (PHILIPPE DESCAMPS: “Da ciencia a política”. Le Monde
Diplomatique, novembro 2015).
Unha vez mais a
solución é política como así o demostran as evidencias. A evidencia de que as
actividades que mais contribúen ao quentamento da atmosfera –aquelas que usan
como combustible o petróleo, o gas e carbón- son tamén aquelas que perciben das
administracións públicas as maiores subvencións –superiores ás que perciben as
que se apoian nas enerxías alternativas- A evidencia de que son os estados mais
avanzados os que mais contaminan: entre os Estados Unidos (27%) e a Unión
Europea (24%) acumulan mais de 700.000 millóns de toneladas de emisións de
dióxido de carbono (CO2) que supoñen a metade (51%) do total mundial. En relación
a España compre subliñar que no ano 2012 superaba nun 15% o prometio máximo
fixado no protocolo de Kioto (27%) sendo o estado industrializado onde mais
medraran as emisións. En Galiza superouse o prometio nun 10%.
Os datos
apuntan, xa que logo, a que estados son os que teñen que facer un maior esforzo
na redución da emisión de gases –Estados Unidos e a Unión Europea- e que
actividades teñen que ter un maior control –as que usan petróleo, gas e
carbón-. Como se pode ver son os estados do Norte –os mais ricos- quen mais
contribúen ao cambio climático. Nembargante están sendo os estados do Sur –os
mais pobres- quen mais están sufrindo as consecuencias dese cambio:
desertización, furacáns, monzóns.
E urxente que os
estados cheguen a un acordo. Un acordo que con Obama na presidencia dos Estados
Unidos –Obama, afortunadamente non é George H.W. Bush quen fixera fracasar o cumio
de Río (1992): “o american way of life
non e negociable”- parece mais viable aínda que nos quedan as dúbidas de cal
será o comportamento de moitos estados europeos, desta Unión Europa que non parece
quen de camiñar pola senda do sentido común.
Manoel Barbeitos Alcántara
No hay comentarios:
Publicar un comentario