O ano 2015 rematou
dándonos algunhas novas económicas sobre as que vale a pena facer unha pequena
reflexión dada a utilización política que no seu día se fixo e que agora tamén
se fai.
Segundo nos informa o
Banco de España no ano 2015 a débeda do conxunto das Administracións Públicas
españois situouse nos 1,08 billóns de euros que equivalen practicamente ao 100%
do PIB. Pola súa parte a débeda privada
correspondente as familias situouse nos 0,73 billóns de euros que equivaleron
ao 67,5% do PIB español.
Agora se votamos a
vista atrás vemos como estas dúas débedas tiveron un distinto comportamento
durante a longa recesión que seguiu a grande crise (2008): mentres a débeda
pública disparouse dende o 39,5% do PIB -0,44 billóns de euros- ao 100% do
PIB -1,08 billóns-, é dicir que
duplicouse, a débeda privada das familias diminuíu pasando do 81,7% do PIB
-0,91 billóns de euros- ao 67,5% do PIB -0,73 billóns-.
Aínda que nalgúns
datos sobre as débedas poda haber unha certa inseguridade sobre a súa
fiabilidade todo parece confirmar que cando estoupou a crise (2008) o grande
problema era a débeda privada
(familias, empresas, bancos) que estaba situada nos 3,2 billóns de euros
equivalentes ao 280% do PIB un monto moi superior, como se pode ver a débeda
pública que estaba situada nos 0,45 billóns de euros equivalentes ao 39,5% do
PIB.
Logo dunhas durísimas
políticas de axuste fiscal e rebaixa salarial xustificadas polas elites
políticas, económicas e mediatices en que “vivíramos por riba das nosas
posibilidades”, atopámonos con que, tal e como sinalaba, a débeda pública
disparouse ata situarse nos 1,08 billóns de euros que equivalen ao 100% do PIB e
que ven a ser o dobre do valor que tiña cando estoupou a crise. Agora si que a débeda
pública pasou a ser un problema macroeconómico relevante pero polas razóns que
xa apuntamos nalgún artigo anterior –a caída dos ingresos- (“Déficit público e mentiras”, 17.04.2016).
Disparouse a débeda
pública mentres que no grupo das débedas privadas, e votando man dos datos que
dispoñemos que, como dicía, proceden basicamente do Banco de España, se a
débeda das familias caeu 14 puntos –pasou do 81,7% do PIB ao 67,5%- o que
reflicte un enorme esforzo por parte daquelas, a débeda das empresas permaneceu
practicamente estancada –entre o 107,8% e o 111,2 do PIB-, ao igual que sucede
coa débeda dos bancos que, a pesar do escurantismo nos datos, parece que segue
medrando –pasou do 89,8% ao 110% do PIB-.
Datos estatísticos que
amais de reflectir o fracaso mais absoluto da política gobernamental do PP
(Mariano Rajoy-Cristobal Montoro-Luis de Guindos) mostran tamén as mentiras en
que se apoian os seus argumentos políticos. Unhas mentiras que hai que estender
a troica (BCE, CE, FMI) pero que están servindo para que, como xa sinalamos
noutro texto (“A vella loita de clases”,
22.03.2016), as rendas do capital manteñan unhas ganancias crecentes e zumarentas
ao tempo que caen as rendas do traballo e cada vez mais familias galegas i
españolas vivan ao borde da pobreza: elevado desemprego, baixos salarios,
axustes continuos nas prestacións e nos servizos públicos…. o chamado
“austericidio” que, entre outros efectos, provoca que a taxa de suicidios entre
as clases populares se dispare en Galiza e en España.
A nivel macroeconómico
esta situación das débedas está na base da enorme debilidade que presenta a
demanda en Galiza e en España e que impide a recuperación económica. Unha
debilidade que afecta ao gasto global: familias –elevado desemprego, caída dos
salarios, elevada débeda-, empresas –elevada débeda, caída das vendas, baixo
investimento- e administracións públicas –austeridade fiscal, déficits e
débedas públicos disparados, sen control-.
A tristeza é que estes
argumentos neoliberais son tamén os argumentos de outras formacións que se
presentan como modernas e alternativas. Ver para crer!.
Manoel Barbeitos Alcántara
No hay comentarios:
Publicar un comentario