INCREIBLE PERO CERTO

Algunhas novas desta semana recollidas en distintos medios de comunicación e opinión veñen a ser unha evidencia mais do que repetidamente sinalamos neste foro: ó grande déficit democrático que existe en España e que resulta moi evidente nos aparatos do estado. Uns aparatos do estado cuxo comportamento, con demasiada frecuencia, lembra comportamentos do anterior estado fascista español. Parecera que en demasiados dos seus departamentos aínda non entrou a democracia e seguen os mesmos comportamentos fascistoides. Uns comportamentos que contan, as veces, coa complicidade cando non co estímulo de responsables políticos e medios de comunicación e opinión –“a caverna mediática”-.

Agora, grazas a algúns medios de comunicación –moi especialmente a PUBLICO dixital- os cidadáns galegos e españois vimos de saber que nas “cloacas do estado español” seguen cociñándose as mais sinistras conspiracións contra, por exemplo, partidos políticos democráticos. Trátase de cociñar falsos informes sobre prácticas consideradas non lícitas de partidos políticos democráticos e con responsabilidades de goberno –agora ERC e Ciu, antes, agora e sempre PODEMOS- co gallo de que a súa ampla difusión poida contribuír ao desprestixio e  repudio da cidadanía deica eses partidos democráticos. Que incluso se poda lograr a intervención punitiva do poder xudicial –fiscalía xeral ….-.

Por si o asunto –unha conspiración mafiosa- non agochara a suficiente gravidade por si mesmo, a operación aparece como gravísima cando saen a luz os responsables políticos implicados nesta auténtica trama parafascista impropia dun estado democrático e de dereito. Aparecen implicados, nada mais e nada menos, que o titular do Ministerio de Interior –Jorge Fernández Díaz- e o seu segundo Francisco Martinez –Secretario de Estado de Seguridade-, amais doutros altos funcionarios quen contan coa colaboración do Xefe da Oficina Antifraude de Catalunya –Daniel de Alfonso-. Por si isto non fora suficiente, o Ministro de Interior afirma –en conversacións recollidas polos medios de comunicación- que o seu xefe, Mariano Rajoy que é, nin mais nin menos, que o Presidente do Goberno, ESTA ENTERADO da operación mafiosa polo que é de supoñer que a apoia. GRAVÍSIMO nun estado democrático: como  evitar a sospeita de que estas prácticas mafiosas son cotidiás e de que afectan a tódolos partidos democráticos da oposición e incluso a moitos cidadáns críticos co goberno.

Para o “éxito” da operación estes responsables políticos contaban coa colaboración, unha vez mais, de medios de comunicación e opinión e de pseudoperiodistas que, fieis aos seus orixines franquistas, encargaríanse de divulgar ampla e profusamente os informes elaborados por esta trama. De novo ponse en evidencia que demasiados medios de comunicación e opinión galegos e españois, demasiados pseudoperiodistas son, seguen sendo, un auténtico perigo para a democracia española.

O móbil –espiar a partidos democráticos con fines ilícitos e inmorais- engade aínda mais encoro a trama. Engade mais razóns para o total rexeitamento cidadán.

Levamos, en España, 40 anos de democracia. Pasaron polo goberno español diferentes partidos democráticos: UCD (1977-1982), PSOE (1982-1996; 2004-2011) e PP (1996-2004, 2011-2015). Pero as cloacas do estado seguen infestadas de xermines fascistas que poñen en risco a democracia, atacan a seguridade cidadán e cuestionan a necesaria decencia política moi concretamente a decencia na política de estado. Compre por elo pedir responsabilidades e, de inmediato, dimisións e ceses. Compre, no curto e medio prazo, esixir aos gobernantes, moi especialmente aos que saian das novas eleccións democráticas, que limpen dunha vez as cloacas do estado español para que así os cidadáns nos podamos sentir seguros. Por que, con estas prácticas mafiosas, non podemos estalo.

Compre castigar politicamente aos responsables tanto de que existan estas prácticas como de non ter limpado as cloacas do estado cando puideron facelo. Compre esixirlle a tódolos partidos democráticos, e a tódolos medios de comunicación un firme compromiso nesta dirección. Compre reclamar de tódolos cidadáns o repudio total destas practicas mafiosas.

Manoel Barbeitos