Nos últimos anos foi decaendo a miña ilusión polo acto que cada 25 de xullo
ven convocando en Rianxo o PSdeG-PSOE para celebrar o día de Galicia.
Fai pouco que lin unhas declaracións de Xesús Alonso Montero, quen dicía
sentirse estrañado dende fai xa moitos anos por esta celebración dos
socialistas en Rianxo tendo como grande referente a Castelao, insigne fillo
desta vila, pero en modo algún figura representativa dos socialistas galegos.
Si e certo, que o ilustre rianxeiro, foi e segue sendo unha figura senlleira da
loita contra a ditadura franquista, un referente imprescindible na conquista do
Estatuto de Galicia e un humanista digno
de admiración e gran impulsor do
galeguismo, pero a súa militancia e compromiso nunca estivo cos socialistas
nin coas súas organizacións, senón co
Partido Galeguista. De feito nas
eleccións celebradas en febreiro de 1936, foi elixido Deputado por Pontevedra
en representación do Partido Galeguista. Foi director de A Nosa Terra, órgano
do Partido Galeguista entón e hoxe voceiro oficial do BNG.
Esta por saber cales foron as razóns concretas polas que os socialistas
galegos elixiron Rianxo para celebrar cada ano o Día de Galicia, pero estou
seguro que entre elas estivo o feito de “saír da baraúnda político-festiva de
Santiago” e xuntarse nun espazo no que expor con mais sosego o punto de vista
do partido en relación a conxuntura política de cada ano. Neste senso,
seguramente tivo importancia que na vila de Rianxo, a candidatura dos
socialistas, encabezada por Xosé Bravo Frieiro, obtivese 15 dos 17 concelleiros
electos nas eleccións de 1979 e fose reelixido con sucesivas maiorías absolutas
nas seguintes convocatorias. Tampouco se pode esquecer a tradicional
dificultade dos socialistas galegos para poñerse de acordo en temas como este.
E sabido que o berce dos socialistas galegos foi Ferrol, onde naceu a
primeira Agrupación Socialista de Galicia, aínda que logo sería Vigo e o resto
da provincia de Pontevedra onde o PSOE tería ate 1936 as organizacións máis
numerosas, activas e influentes. Falando de Ferrol e pensando nunha localidade
na que celebrar actos como o do “Día de Galicia”, ademais do anterior xusto é
recordar dous detalles: En Ferrol naceu,
foi a escola e viviu ate os 10 anos, Pablo Iglesias o fundador do PSOE e
da UGT. De Ferrol era alcalde Xaime Quintanilla Martínez, fusilado o 18 de
agosto de 1936 nas tapias do cemiterio de Canido
.
Xaime Quintanilla Martínez segue a
ser un grande descoñecido para a sociedade galega e incluso para a maioría dos
socialistas galegos de hoxe. A consigna do franquismo trala guerra de
“esquecemento e silencio” sobre o acontecido naqueles anos terribles deu os
seus froitos. Médico, escritor e político, con moitas semellanzas con Castelao
en canto a pensamento e actividades, con unha diferenza importante. Castelao morreu no exilio en Bos Aires con 64
anos e Quintanilla morreu asasinado en Ferrol cando tiña 38 anos.
No ano 2011, os historiadores Ana Romero Masiá e Carlos Pereira Martínez publicaron
unha documentadísima biografía de Xaime Quintanilla, na que amosan a súa traxectoria como político, como médico,
como periodista, autor de teatro e impulsor das Irmandades da Fala. Un grande
traballo de investigación para un grande personaxe.
E dicir, que sen menoscabo de Rianxo, Ferrol reúne as mellores condicións
para acoller, cando menos un ano, a celebración anual do Día de Galicia polos
socialistas galegos. Igual que Ferrol podería ser Betanzos, onde se recorda
a figura de Ramón Beade Méndez.
Destacado líder agrario elixido Deputado por A Coruña en 1931 e 1936, con
amplísima traxectoria no PSOE e na UGT. Trala Guerra Civil viviu oculto en
Betanzos, sendo dado por morto. Permaneceu nesta situación ate que en 1947
entrou en contacto coas organizacións socialistas no exilio para traballar na
reorganización do movemento socialista clandestino na Coruña. Foi detido en
xuño de 1951 e condenado a doce anos. Faleceu o 3 de xullo de 1956, constituíndo o seu enterro
civil (en plena ditadura e baixo severo control policial), unha das
maiores manifestacións celebradas en
Betanzos.
Igual que Ferrol ou Betanzos, con igual merecemento podería ser A Coruña,
Ourense, Lugo, ou Vigo, ou Pontevedra, ou decenas de localidades onde insignes
socialistas seguen aínda a espera de ser recordados e de recibir a homenaxe que
merecen. Se non Ferrol, cabería pensar na súa celebración de xeito rotatorio, contribuíndo
así a que o PSdeG-PSOE recupere para Galicia e para a súa propia historia a
memoria de auténticos mártires dos ideais socialistas.
Xesús Mosquera Sueiro / 3 de Agosto do 2017
No hay comentarios:
Publicar un comentario